Category Archives: Blog

പൊട്ടിത്തെറിക്കുന്ന ക്ഷേത്രങ്ങള്‍

പൊട്ടിത്തെറിക്കുന്ന ക്ഷേത്രങ്ങള്‍

(1) കൊല്ലം പരവൂര്‍ പുറ്റിങ്കല്‍ ക്ഷേത്രത്തിലെ വെടിക്കെട്ട് ദുരന്തം ഹൃദയഭേദകമാണ്. നൂറിലധികംപേര്‍ കൊല്ലപ്പെട്ടു, നാനൂറിലധികം പേര്‍ക്ക് പരിക്കേറ്റു. പലരുടെയും പരിക്ക് മാരകം. 1980 മുതല്‍ ക്ഷേത്ര സമീപത്ത് വസിക്കുന്ന ഒരു പ്രവാസി അവിടെ നടക്കുന്ന അനധികൃത മത്സരവെടിക്കെട്ടിനെതിരെ പരാതിപ്പെടുന്നുണ്ട്. വെടിക്കെട്ട് സമീപത്തുള്ള വീടുകള്‍ക്ക് ഹാനികരമായിരുന്നു. ഇക്കുറി കളക്ടര്‍ക്ക് തന്നെ പരാതി കൊടുത്തു. അന്വേഷണം നടത്തിയ കളക്ടര്‍ വെടിക്കെട്ട് നിരോധിക്കാന്‍ തീരുമാനിച്ചതാണ്. പക്ഷെ ഭരണാധികാരികളുടെയും രാഷ്ട്രീയക്കാരുടെയും കൂട്ട പ്രതിരോധത്തില്‍ ആ തീരുമാനം നടപ്പിലാകാതെപോയി. ആഭ്യന്തരവകുപ്പ് അടക്കമുള്ള വകുപ്പുകളുടെ പ്രത്യക്ഷവും പരോക്ഷവുമായ പിന്തുണ ക്ഷേത്രക്കാര്‍ക്കുണ്ടായിരുന്നുവത്രെ. ഭക്തരുടെ വഴിപാടായാണ് കമ്പം(വെടിക്കെട്ട്) നടത്തുന്നതെന്നും അത് നിരോധിക്കുന്നത് ഭക്തവികാരത്തെ മുറിപ്പെടുത്തുമെന്നുമായിരുന്നു രാഷ്ട്രീയക്കാരുടെ പൊതുനിലപാട്. Continue Reading

വേനല്‍ക്കാല വിനോദങ്ങള്‍

(1) ഉത്തര്‍പ്രദേശിലെ ലഖ്‌നൗവിന് അടുത്തുള്ള ഡാലിഗഞ്ച് റെയില്‍വെ പാലത്തിനടുത്ത് താമസിക്കുന്ന കൗമാരക്കാരും യുവാക്കളും കണ്ടെത്തിയ സവിശേഷമായ ഒരു വേനല്‍ക്കാല വിനോദം വിദേശ മാധ്യമങ്ങളുടെ വരെ ശ്രദ്ധയാകര്‍ഷിക്കുകയുണ്ടായി. അക്ഷരാര്‍ത്ഥത്തില്‍ തീവണ്ടിക്ക് ”അട വെക്കലാണ്” പ്രസ്തുത വിനോദം. തീവണ്ടി വരുന്ന സമയം നോക്കി ഒറ്റവരിപാലത്തില്‍ കയറി നില്‍ക്കുക, തീവണ്ടി തൊട്ടടുത്ത് എത്തുമ്പേഴേക്കും താഴെ നദിയിലേക്ക് എടുത്തു ചാടുക, നീന്തി കരകയറുക-സിമ്പിള്‍. ഈ കളി വര്‍ഷങ്ങളായി തുടര്‍ന്നുവരികയാണത്രെ. (2014 ലെ ഒരു റിപ്പോര്‍ട്ട് ഇവിടെ വായിക്കാം)

Continue Reading

ഫൈന്‍മാന്റെ ചോദ്യം

12802948_980464988656889_7276740513557014537_n

(1) കഥാനായകന്‍ മാറുമെങ്കിലും പ്രസിദ്ധി വിട്ടുപിരിയാത്ത ഒരു കഥയുണ്ട്. കുറച്ച് തത്വചിന്താപരമാണ്. പ്രസിദ്ധ അമേരിക്കന്‍ ഭൗതികശാസ്ത്രജ്ഞന്‍ റിച്ചാഡ് ഫൈന്‍മാന്റെ (Richard Feynman/1918-1988)പേരിലാണ് കൂടുതലും കേട്ടിട്ടുളളത്.

സൈന്യത്തില്‍ ചേരാന്‍ ചെന്ന യുവാവായ ഫൈന്‍മാനോട് ഇന്റര്‍വ്യു ബോര്‍ഡ് ഒരു അപ്രതീക്ഷിത ചോദ്യമെറിഞ്ഞു: ”മി ഫൈന്‍മാന്‍, ഒരു സൈനികന്റെ ജീവിതം ജീവന്‍മരണപ്പോരാട്ടമാണ്. നിങ്ങള്‍ സ്വന്തം ജീവനു എന്തു വിലയാണ് കല്‍പ്പിക്കുന്നത്?”

”16789 അമേരിക്കന്‍ ഡോളര്‍!”- ഫൈന്‍മാന്റെ വെടിയുണ്ടപോലുള്ള മറുപടി ബോര്‍ഡിനെ സ്തബ്ധമാക്കി. ഞെട്ടല്‍ വിട്ടുമാറിയ അവരിലൊരാള്‍ ചോദിച്ചു: എന്തുകൊണ്ട് 16789? എന്തുകൊണ്ട് 16788 ഓ 16790 ഓ അല്ല? എന്തകൊണ്ടോ ആയിരമോ പത്തുലക്ഷമോ അല്ല?

”സര്‍, ഈ ചോദ്യത്തിനു ഏത് സംഖ്യ ഉത്തരമായി പറഞ്ഞാലും താങ്കള്‍ ഇതേ ചോദ്യം തന്നെ എന്നോട് തിരിച്ചു ചോദിക്കുമായിരുന്നു….”

(2) രാഹുല്‍ ഈശ്വര്‍ ഏഷ്യാനെറ്റ് കേബിള്‍ വിഷനില്‍(ACV) ‘എന്റെ ദൈവം’ എന്നൊരു അഭിമുഖ പരിപാടി ചെയ്യുന്നുണ്ട്. പ്രമുഖ വ്യക്തികള്‍ വന്നിരുന്ന് അനുഭവസാക്ഷ്യവും കരിഷ്മാറ്റിക്ക് ബോധ്യങ്ങളും വര്‍ണ്ണിക്കുന്ന ഒരു പരിപാടിയാണത്. എന്തുകൊണ്ടോ ഞാനും പരിപാടിയിലേക്ക് ക്ഷണിക്കപ്പെട്ടു. ഏഴെട്ടു മാസംമുമ്പ് പ്ലാന്‍ ചെയ്തിരുന്നതാണെങ്കിലും കഴിഞ്ഞ ബുധനാഴ്ചയാണ് ഷൂട്ടിംഗ് നടന്നത്. എന്റെ ദൈവം സംബന്ധിച്ച അനുഭവമുണ്ടോ എന്നതരത്തിലുള്ള ചോദ്യം ആവര്‍ത്തിക്കപ്പെട്ടു. വിശ്വാസഘട്ടത്തിലെ പഴയ ഒരനുഭവം ഞാന്‍ പരാമര്‍ശിച്ചു:

(3) നാലാം ക്ലാസ്സ് വരെ പഠിച്ചത് നാട്ടിലെ ഒരു സ്‌ക്കൂളിലായിരുന്നു. 1980 ല്‍ അഞ്ചാംക്ലാസ്സില്‍ പഠിക്കാനായി 12-13 കിലോമീറ്റര്‍ അകലെയുള്ള മുഖത്തല സെന്റ്ജൂഡ് ഹൈസ്‌ക്കൂളിലേക്ക് പോയി. ഒരു കൃസ്ത്യന്‍ റെസിഡന്‍ഷ്യല്‍ സ്‌ക്കൂളായിരുന്നു അത്. പ്രൈമറിസ്‌ക്കൂള്‍ അദ്ധ്യാപികയായിരുന്ന അമ്മ ആ വഴിക്കുള്ള വേറൊരു സ്‌ക്കൂളിലേക്ക് പോയിരുന്നതുകൊണ്ടാണ് ദൂരംകൂടുതലായിട്ടും പ്രസ്തുത സ്‌ക്കൂള്‍ തെരഞ്ഞടുത്തതെന്ന് തോന്നുന്നു. മിക്ക ദിവസവും അമ്മയും ഞാനും ഒരു ബസ്സിലാണ് യാത്ര ചെയ്തിരുന്നത്. അന്നൊക്കെ സ്വകാര്യബസ്സിന്റെ മുന്‍വശത്ത് എഞ്ചിനു സമീപത്തായിട്ടാണ് ചെറിയ ആണ്‍കുട്ടികളെ അക്കോമൊഡേറ്റ് ചെയിരുന്നത്. 25 പൈസ ആയിരുന്നു ബസ് ചാര്‍ജ്ജ്. ബസ്സിന്റെ മുന്നിലെന്ന് പറഞ്ഞാല്‍ മുന്‍വശത്തെ ഗ്ലാസ്സ് തൊട്ടിയുരുമ്മി നില്‍ക്കും. ചുറ്റും സ്ത്രീകളായിരിക്കും. ഞങ്ങള്‍ അവിടെ നിന്ന് വാഹനങ്ങളുടെ നമ്പര്‍ പറഞ്ഞു കളിക്കും, അലയ്ക്കും.. വഴക്കുകൂടും.. വേഗത കൂട്ടാന്‍ ഡ്രൈവറെ പ്രേരിപ്പിക്കും….ഓവര്‍ടേക്ക് ചെയ്യ് അങ്കിള്‍…. എന്നതായിരുന്നു സ്ഥിരം നിര്‍ദ്ദേശം!

12802948_980464988656889_7276740513557014537_n

(4) അഞ്ചാംക്ലാസ്സിലെ ഓണപരീക്ഷ കഴിഞ്ഞപ്പോള്‍ വലിയൊരു അപകടമുണ്ടായി. അമ്മ അന്നു ബസ്സിലില്ല. എതിരെവന്ന വണ്ടി ഞങ്ങള്‍ സഞ്ചരിച്ച വണ്ടിയുടെ മുന്‍വശത്ത് ഇടിച്ചു. നിയന്ത്രണം തെറ്റി ബസ്സ് ഓടയിലേക്ക് പോയി. മുന്‍വശത്തെ കണ്ണാടി പൊട്ടിത്തെറിച്ചു. പലര്‍ക്കും സാരമായ പരിക്കുകള്‍ പറ്റി. ഡ്രൈവറുടെ പരിക്ക് മാരകമായിരുന്നു. തല ചെന്ന് സ്റ്റീയറിംഗ് വീലില്‍ ഇടിച്ചു, ഗ്ലാസ്സ് ശരീരത്തില്‍ കുത്തികയറി….എന്റെ തൊട്ടടുത്തു നിന്ന അമ്മമാര്‍ക്കും ചേച്ചിമാര്‍ക്കും നല്ല തോതില്‍ പരിക്കേറ്റു… പലരുടെയും ശരീരത്തില്‍ ഗ്ലാസ്സ് തുളച്ചുകയറി. ആകെ ബഹളമയം…നിലവിളി….രക്തം, ഞരക്കങ്ങള്‍…ഡ്രൈവറെ ആശുപത്രിയിലേക്ക് മാറ്റി. അയാള്‍ പിന്നീട് ഒരിക്കലും വണ്ടി ഓടിച്ചിട്ടില്ല. രണ്ടു മാസം കഴിഞ്ഞ് ആശുപത്രിയില്‍ തന്നെ കിടന്നു മരിച്ചു. മുന്‍വശത്ത് നിന്നവര്‍ക്ക് മാത്രമാണ് കാര്യമായി പരിക്കേറ്റത്. അത്ഭുതകരമെന്ന് പറയട്ടെ, ചരിഞ്ഞു, കൈകുത്തി വീണന്നല്ലാതെ ഏറ്റവും മുമ്പില്‍ ഗ്ലാസ്സിനോട് ചേര്‍ന്ന് നിന്ന എനിക്ക് ഒരു പോറല്‍ പോലും സംഭവിച്ചില്ല!!

(5) എങ്ങനെയോ വാര്‍ത്ത സ്‌ക്കൂളില്‍ അറിഞ്ഞിരുന്നു. ആദ്യത്തെ പീരിയഡില്‍ ക്ലാസ്സ് ടീച്ചര്‍ ഈ വിവരം സൂചിപ്പിച്ചുകൊണ്ടാണ് തുടങ്ങിയത്… വീ ഹാഡ് മിസ് ഹാപ്പ് നിയര്‍ പെരുമ്പുഴ ടുഡെ, ഔര്‍ രവിചന്ദ്രന്‍ വോസ് ആള്‍സോ ഇന്‍ ദ ബസ്സ്, പ്രെയിസ് ദ ലോഡ്… ഹീ വോസ് സേവ്ഡ് ബൈ ദ ഓള്‍മൈറ്റി…. നോട്ട് ഈവന്‍ എ സ്‌ക്രാച്ച്….ഇങ്ങനെയാണ് ദൈവം നമുക്ക് വേണ്ടി പ്രവര്‍ത്തിക്കുന്നത്…അവന്‍ എല്ലാവര്‍ക്ക് വേണ്ടിയും പ്രത്യേകം പ്രത്യേകം പദ്ധതികള്‍ ഇട്ടിട്ടുണ്ട്…യേശു ഒരിക്കലും നമ്മെ വിട്ടുകൊടുക്കില്ല….നോക്കൂ, ഒരു പൂച്ചകുട്ടിയെ പൊക്കിയെടുക്കുന്നത് പോലെയാണ് രവിയെ ദൈവം രക്ഷിച്ചത്…ലെറ്റ് അസ് റിജോയ്‌സ് ഹിസ് ലക്ക്, ദ ബ്ലെസ്സിംഗ് ഹീ ഗോട്ട്… ഓ.. ജീസസ്… അദ്ദേഹം ഇതു പറഞ്ഞതും എനിക്ക് വല്ലാതെ സങ്കടംവന്നു. കണ്ണില്‍ വെള്ളംനിറഞ്ഞു… പലരെയും ശിക്ഷിച്ചിട്ടും എന്നെ മാത്രം രക്ഷിച്ച കരുണാമയനായ യേശുവിനോടുള്ള എന്റെ ആരാധന കഠിനമായി.

(6) ഞാന്‍ പരിക്കേല്‍ക്കാതെ ജീവിക്കണമെന്ന് ദൈവം ആഗ്രഹിക്കുന്നു! നിഴല്‍പോലെ അവന്‍ എന്റെ കൂടെയുണ്ട്! പിന്നെ കുറേക്കാലം ബൈബിളും യേശുവും ഒക്കെയായിരുന്നു. നോട്ട് ബുക്കില്‍ ഗോഡ് ഈസ് ലവ് എന്നെഴുതുക, കുരിശിന്റെ പടംവരയ്ക്കുക തുടങ്ങിയ പരിപാടികള്‍ സ്ഥിരമായി. സ്‌ക്കൂളിനടുത്തുള്ള ബോഡിംഗില്‍ ഒരു ചര്‍ച്ചുണ്ട്. ഉച്ചയ്ക്ക് ഊണു കഴിഞ്ഞ് അവിടെ പോയിരുന്നു ഒറ്റയ്ക്ക് പ്രാര്‍ത്ഥിക്കും. കാരണം ഞാനും അവനും തമ്മില്‍ മാറ്റാരും അറിയാത്ത, രഹസ്യമായി ഒരു വ്യക്തിബന്ധം തന്നെ ഉണ്ടെന്ന് ബോധ്യപ്പെട്ടതാണല്ലോ. യേശുവാണ് രക്ഷിച്ചതെന്ന കാര്യത്തില്‍ യാതൊരു സംശയവുമുണ്ടായില്ല. അല്ലെങ്കില്‍ ഏറ്റവുമധികം അപകടം പറ്റേണ്ടത് എനിക്കാണ്….ഒരുപക്ഷെ മരണംതന്നെ! എന്തുകൊണ്ട് ഞാന്‍ മാത്രം രക്ഷപെട്ടു….? അതെങ്ങനെ വിശദീകരിക്കും? മിറക്കിള്‍ കഥകള്‍ വായിച്ച് ഞാന്‍ സംഗതി തീര്‍ച്ചപ്പെടുത്തി….! സ്ഥിരം കൃഷ്ണനും ശിവനുമൊക്കെ സഹായിച്ചുകൊണ്ടിരുന്ന സ്ഥാനത്ത് യേശുവിനെകൂടെ കൂട്ടി. കുറെക്കാലം ഘോരപ്രാര്‍ത്ഥനയും ദൈവവുമായി സംസാരിക്കലുമൊക്കെ ഉണ്ടായിരുന്നു. പക്ഷെ ആറാം ക്ലാസ്സ് അവസാനമായതോടെ മതചപലതകളില്‍ നിന്നും ക്രമേണ പുറത്തുവന്നു…. ഏഴാം ക്ലാസ്സില്‍ പ്രാര്‍ത്ഥനകള്‍ പൂര്‍ണ്ണമായി നിലച്ചു…

(7) മതവിശ്വാസം അപസ്മാര സമാനമായ ഒരു മാനസികചപലതയാണ്. ബഹുഭൂരിപക്ഷവും കൊണ്ടുനടക്കുന്നതിനാല്‍ അതിനെ രോഗം എന്നാരും വിളിക്കുന്നില്ലെന്ന് മാത്രം. പക്ഷെ തന്റെ ബോധ്യങ്ങള്‍ യുക്തസഹവും സാധുവുമാണെന്ന് കാണിക്കാന്‍ വിശ്വാസി ഏതുതരം വാദങ്ങളും ഉപയോഗിക്കും. ഗംഗ മാതൃകയില്‍ തുള്ളിവിറയ്ക്കും! അനുഭവസാക്ഷ്യം വിവരിക്കുന്ന വിശ്വാസിയുടെ മുഖവും ശരീരഭാഷയും കണ്ടുനില്‍ക്കുന്നവരില്‍ അത്ഭുതവും ഭയവും നിറയ്ക്കും. അവിടെ യുക്തിഹീനതയും വൈകാരികചപലതയും അയാള്‍ക്കൊരു പ്രശ്‌നമല്ല. വല്ലാത്തൊരു ലഹരിയിലാണവര്‍.. സര്‍വ ജീവിതനേട്ടങ്ങളും ദൈവാനുഗ്രഹമാണെന്നും കോട്ടങ്ങള്‍ ഭക്തി നേര്‍പ്പിക്കപ്പെടുന്നതുകൊണ്ടാണെന്നും സ്വയം ബോധ്യപ്പെടുത്തിയാണവര്‍ മുന്നേറുന്നത്. തന്റെ മാനസികാവസ്ഥയ്ക്ക് മതപുസ്തകങ്ങളില്‍ ന്യായീകരണം കണ്ടെത്താനും നിസ്സാരമായി അവര്‍ക്കു സാധിക്കുന്നു.

(8) അന്നെനിക്ക് ബസ്സ് കിട്ടിയില്ലായിരുന്നുവെങ്കില്‍, പനി പിടിച്ച് വീട്ടില്‍ കിടന്നിരുന്നെങ്കില്‍, ചെറിയ ഒരപകടം മാത്രം പറ്റിയിരുന്നെങ്കില്‍…..കൈ മാത്രം മുറിഞ്ഞിരുന്നെങ്കില്‍, അതിലും വലിയ പരിക്കേറ്റിട്ടും ജീവന്‍ രക്ഷപെട്ടിരുന്നെങ്കില്‍…..എന്തു സംഭവിച്ചിരുന്നെങ്കിലും എന്റെ മതമനസ്സ് അതു ദൈവികഇടപെടലായി തന്നെ വ്യാഖ്യാനിക്കുമായിരുന്നു. മരിച്ചിരുന്നെങ്കില്‍ ”ദൈവം രവിയെ ഏറെ ഇഷ്ടപ്പെട്ടതിനാല്‍ അവനെ നേരത്തെ വിളിച്ചു….നമുക്ക് അവനു വേണ്ടി പ്രാര്‍ത്ഥിക്കാം” എന്ന് അതേ ക്ലാസ്സ് ടീച്ചര്‍ പറഞ്ഞേനെ! സാധാരണ വാഹനാപകടമുണ്ടാകുമ്പോള്‍ ഒ! ദൈവമേ, ഞാന്‍ ആ തീവണ്ടിയില്‍ ബുക്ക് ചെയ്തിരുന്നതാണ്, ഞാന്‍ ബുക്ക് ചെയ്ത കമ്പാര്‍ട്ടമെന്റാണ് അപകടത്തില്‍ പെട്ടത്!…..ഞാന്‍ ആ വിമാനത്തില്‍ പോകാനിരുന്നതാണ്….യാത്രാ പേപ്പറുകള്‍ ശരിയാക്കി തരാതെ ദൈവംകാത്തു… എന്നൊക്കെ പറഞ്ഞ് വെറുപ്പിക്കുന്ന മതവിശ്വാസികള്‍ ധാരാളമുണ്ടല്ലോ….!!

(9) ഫൈന്‍മാന്റെ കഥയില്‍ കണ്ടതുപോലെ….വിശ്വാസിയെ സംബന്ധിച്ചിടത്തോളം അനുഭവം എന്തായാലും അവ തന്റെ ചക്കരദൈവത്തില്‍ കൊണ്ടുചെന്ന് കെട്ടുക നിര്‍ബന്ധമാണ്. കാരണം അതാണ് അയാളുടെ മനനരീതി. ലോകമെമ്പാടും ഭിന്ന ജാതിമതസ്ഥര്‍ തങ്ങളുടെ ഇഷ്ടമൂര്‍ത്തികളില്‍ ഇത്തരം ഉത്തരങ്ങള്‍ വിജയകരമായി കണ്ടെത്തുന്നു….എന്തുകൊണ്ട് അങ്ങനെ സംഭവിച്ചു…. ? എനിക്ക് വിശദീകരണമില്ല….രക്ഷിക്കാന്‍ കരുണാമയനായ ഒരാളുണ്ടെന്ന് കേട്ടിട്ടുണ്ട്, അങ്ങനെ കഥകളുണ്ട്. അനുഭവസാക്ഷ്യങ്ങളുണ്ട്…മിറക്കിളുകളുണ്ട്….അപ്പോള്‍ പുള്ളിതന്നെയാവും എന്നയും തുണച്ചത്… അല്ലെങ്കില്‍പ്പിന്നെ എന്നേ തുലയണ്ടതാണ്…? സിമ്പിള്‍ ലോജിക്ക്…

(10) മിക്ക ഐ.എ.എസ്-ഐ.പി.എസ്-യു.ജി.സി-ഹൈവോള്‍ട്ടേജ് വേദാന്ത ടീമുകളുടെയും ”ആത്മീയത”, ”ആദ്ധ്യാത്മികത”… എന്നൊക്കെ പറയുന്ന ചരക്കുകള്‍ സത്യത്തില്‍ ഇവയൊക്കെയാണ്. വേദാന്തിയായ അറിയപ്പെടാന്‍ ആഗ്രഹിക്കുന്നു മുന്‍ മാര്‍ക്‌സിസ്റ്റ് ശ്രീ.പി.കേശവന്‍നായര്‍ പച്ചക്കുതിര അഭിമുഖ സമയത്ത് തന്റെ രോഗാവസ്ഥയെക്കുറിച്ച് എന്നോട് പറഞ്ഞതിങ്ങനെ: “വേണമെങ്കില്‍ ഞാനതില്‍ തട്ടിപോകാമായിരുന്നു, പക്ഷെ ഉണ്ടായില്ല….എന്തുകൊണ്ട്? ”’ ‘കട്ട വേദാന്തി’കളുടെ അവസ്ഥ ഇതാണെന്നിരിക്കെ സാധാരണക്കാരുടെ കാര്യം പറയേണ്ടതില്ലല്ലോ. എന്തു സംഭവിച്ചാലും ഒന്നും തന്നെ സംഭവിച്ചില്ലെങ്കിലും പ്രതികൂലമായി സംഭവിച്ചാലും അനുകൂലമായി സംഭവിച്ചാലും അവര്‍ ഒരേതരം ചോദ്യങ്ങള്‍ ആവര്‍ത്തിച്ചുകൊണ്ടിരിക്കും: ദൈവം അല്ലെങ്കില്‍ പിന്നെ ആരാണ് കൊല്ലത്തേക്ക് പോയ എന്നെ കൊല്ലത്ത് തന്നെ എത്തിച്ചത്? വേറെ എവിടെയെല്ലാം പോകാമായിരുന്നു? മറ്റെന്തൊക്കെ സംഭവിക്കാമായിരുന്നു?!

കുറെ ഗ്രഹണങ്ങള്‍ കിട്ടിയിരുന്നെങ്കില്‍…

1) സൂര്യഗ്രഹണം കാരണം നട അടയ്ക്കുമെന്ന് ഇന്നത്തെ മനോരമയില്‍
വാര്‍ത്ത. നാളെ രാവിലെ 5.05 മുതല്‍ 6.41 വരെയാണ് അടയ്ക്കുന്നത്. ഒരു മണിക്കൂര്‍ 39 മിനിറ്റ് നീളുന്ന സൂര്യഗ്രഹണമോ?! ഏതു ക്ഷേത്രത്തിനു മുകളിലാണ് ഈ മഹാപാതകം?!

എന്താണ് സൂര്യഗ്രഹണം? ഭൂമിയും ചന്ദ്രനും സൂര്യനും ഒരേ പ്രതലതലത്തില്‍ നേര്‍രേഖയില്‍ വരുമ്പോള്‍ ചന്ദ്രന്റെ നിഴല്‍ മൂലം ഭൂമിയില്‍ പരമാവധി 242-250 കിലോമീറ്ററോളം ചുറ്റളവുള്ള ഭാഗത്ത് സൂര്യനെ കാണാതാവുന്നു. ഈ മറയ്ക്കലിന്റെ പരമാവധി സമയദൈര്‍ഘ്യം ഏതാനും സെക്കന്‍ഡുകള്‍ മുതല്‍ ഏഴര മിനിറ്റുവരെ. സൂര്യപ്രകാശം ഭൂമിയിലെത്താന്‍ വേണ്ട സമയദൈര്‍ഘ്യം പരമാവധി എട്ടര മിനിറ്റ്. മിക്ക സൂര്യഗ്രഹണങ്ങളും ഭാഗികമായിരിക്കും-അതായത് ഒന്നോ രണ്ടോ മിനിറ്റുകള്‍. അപൂര്‍വമായേ സമ്പൂര്‍ണ്ണ സൂര്യഗ്രഹണം കുറച്ച് സ്ഥലത്തെങ്കിലും ലഭ്യമാകൂ.

(2) ഗ്രഹണസമയത്ത് അള്‍ട്രാവയലറ്റ് രശ്മികള്‍ മൂലം വിഗ്രഹത്തിന്റെ ചൈതന്യത്തിനു ലോപം വരുമെന്നാണ് വാര്‍ത്ത പറയുന്നത്. ഈ തള്ളല്‍ കേട്ടാല്‍ ഏഴാം ക്ലാസ്സുവരെ ശ്രദ്ധിച്ച് പഠിച്ചവര്‍ അമ്പരന്നുപോകും. അന്ധവിശ്വാസത്തിനു സയന്‍സിന്റെ നിക്കര്‍ ഇടുവിപ്പിച്ച് നിറുത്താനുള്ള അത്യാഗ്രഹം പ്രകടം. സൗരപ്രകാശ സ്‌പെക്രട്രത്തില്‍ ദൃശ്യപ്രകാശത്തിലെ ഏഴു നിറങ്ങള്‍ക്കു പുറമെ ഇന്‍ഫ്രാറെഡ്, അള്‍ട്രാവയറ്റ്, റേഡിയോ തരംഗങ്ങള്‍, ഗാമാ തരംഗങ്ങള്‍, എക്‌സ് റേ….എന്നിങ്ങനെയുള്ള കിരണങ്ങളുണ്ട്.

(3) അള്‍ട്രാവയലറ്റ് കിരണങ്ങള്‍ നമുക്ക് ഹാനികരമാണെങ്കിലും അവയെ അന്തരീക്ഷത്തിലെ ഓസോണ്‍ പാളി തടഞ്ഞു നിറുത്തുണ്ട്. ഓസോണ്‍പാളിയിലുള്ള വിള്ളല്‍ പ്രധാനമായും ധ്രൂവപ്രദേശത്താണ്. അതാകട്ടെ കാലക്രമേണ കുറഞ്ഞുവരികയുമാണ്. അതായത് അള്‍ട്രാവയലറ്റ് കിരണങ്ങള്‍ നമുക്ക് ഏല്‍ക്കാനുള്ള സാധ്യത കുറവാണ്. സൂര്യഗ്രഹണസമയത്താകട്ടെ, ഒട്ടുമില്ല. കാരണം, സൂര്യപ്രകാശം തന്നെയില്ലല്ലോ!

(4) സത്യത്തില്‍ ഗ്രഹണസമയത്ത് സൂര്യനെ നോക്കരുതെന്ന് സയന്‍സ് പറയുന്നത് അള്‍ട്രാവയലറ്റിനെ പേടിച്ചല്ല. ഗ്രഹണസമയത്ത് നോക്കിയാലും അല്ലാതെ നോക്കിയാലും അള്‍ട്രാവയലറ്റിന്റെ ആക്രമണം നമുക്കുണ്ടാകാനുള്ള സാധ്യത കുറവാണ്-ഓസോണ്‍പാളി ഉള്ളിടത്തോളംകാലം. സൂര്യനെ നേരിട്ടുനോക്കുമ്പോള്‍ പ്രധാന പ്രശ്‌നകാരി ഇന്‍ഫ്രാറെഡാണ്. സൂര്യപ്രകാശത്തിന്റെ താപം വരുന്നത് ഇന്‍ഫ്രാറെഡില്‍ നിന്നാണ്. ഈ രശ്മികള്‍ കണ്ണിന്റെ റെറ്റിനയിലും ചുറ്റുമുള്ള കോശങ്ങളിലും പതിച്ചാല്‍ ആ ഭാഗത്ത് മാരകമായ പൊള്ളലേല്‍ക്കാനുള്ള സാധ്യതയുണ്ട്.

(5) സാധാരണ നിലയില്‍ സൂര്യനെ നോക്കുമ്പോള്‍ നാം ബോധപൂര്‍വം കൃഷ്ണമണി വളരെയധികം ചുരുക്കിയാണ് നോക്കുന്നത്. ആയതിനാല്‍ ഇന്‍ഫ്രാറെഡ് വഴി പൊള്ളല്‍ ഏല്‍ക്കാനുള്ള സാധ്യത കുറയുന്നു. ഗ്രഹണസമയത്ത് സൂര്യപ്രകാശമില്ലാത്തതിനാല്‍ നാം അറിയാതെ കൃഷ്ണമണി വികസിപ്പിച്ച് തന്നെ സൂര്യനെ കണ്‍കുളിര്‍ക്കെ കാണുന്നു.

(6) ഇവിടെയാണ് അപകടകാരണം പതിയിരിക്കുന്നത്. സൂര്യനെ മറച്ചിരിക്കുന്ന ചന്ദ്രന്റെ ഉപരിതലത്തില്‍ വമ്പന്‍ പര്‍വതങ്ങളും കൊടുമുടികളുമുണ്ട്. ചന്ദ്രന്‍ മെല്ലെ ഇളകിയാടുമ്പോള്‍ സൂര്യപ്രകാശം ഈ കൊടുമുടികളുടെ വിടവുകളിലൂടെ വെടിച്ചില്ലുപോലെ ഭൂമിയിലേക്ക് ചിതറിത്തെറിക്കും. കണ്‍കുളിര്‍ക്കെ സൂര്യനെ നോക്കിയിരുന്നാല്‍ പ്രകാശം നേരിട്ട് കണ്ണിനുള്ളില്‍ തന്നെ വീഴും, പൊള്ളലേക്കും. അതുകൊണ്ടാണ് ഗ്രഹണസമയത്ത് സൂര്യനെ നോക്കരുതെന്ന് ഉപദേശിക്കുന്നത്. കാരണം എപ്പോഴാണ് ചന്ദ്രന്‍ തെന്നിമാറുന്നതെന്ന് നമുക്ക് പറയാനാവില്ലല്ലോ! ഗ്രഹണം ഭാഗികമാണെങ്കില്‍ അപകടസാധ്യതയും വലുതാണ്. അതല്ലെങ്കില്‍ സൂര്യനെ നോക്കാന്‍ ഏറ്റവും പറ്റിയ സമയം സമ്പൂര്‍ണ്ണ ഗ്രഹണം തന്നെയാണ്.

(7) ശനിയ്ക്ക് 68+ഉം വ്യാഴത്തിന് 64+ഉം ഉപഗ്രഹങ്ങളുണ്ട്. ദിവസവും അവിടെ നടക്കുന്ന സൂര്യഗ്രഹണങ്ങള്‍ക്ക് കയ്യുംകണക്കുമില്ല. അവിടെയൊക്കെ ഉപഗ്രഹങ്ങള്‍ മൂലം ഉപഗ്രഹങ്ങളില്‍ ഗ്രഹണം സംഭവിക്കാറുണ്ട്! ഗ്രഹണസമയത്ത് ഭൗമാന്തരീക്ഷത്തില്‍ പ്രത്യേകിച്ച് യാതൊരു വിജ്രംഭനവും സംഭവിക്കുന്നില്ല. ദിവസവും അനുഭവിക്കുന്ന ഏറ്റവും വലിയ ഗ്രഹണം രാത്രിയാണ്. ഭൂമിയുടെ തന്നെ നിഴലിലാണ് ഒരു വശമപ്പോള്‍-ശരിക്കും സമ്പൂര്‍ണ്ണഗ്രഹണം! സമ്പൂര്‍ണ്ണ സൂര്യഗ്രഹണമാകട്ടെ ഏതാനും സെക്കന്‍ഡുകള്‍ മുതല്‍ ഏഴരമിനിറ്റു വരെ മാത്രം. സൂര്യഗ്രഹണസമയത്ത് ക്ഷേത്രം അടച്ചിടാനുള്ള തീരുമാനം ഉചിതം തന്നെയാണ്. അത്രയും നേരത്തേക്കെങ്കിലും ശബ്ദമലിനീകരണവും ആക്രാന്തപ്രകടനങ്ങളും വെടിശബ്ദവും ചളിപ്രഭാഷണവും സഹിക്കേണ്ടല്ലോ! സൂര്യഗ്രഹണങ്ങളുടെ എണ്ണം വര്‍ദ്ധിക്കാന്‍ ഡിങ്കന്‍ കനിയുമാറാകട്ടെ.

ദയവ് ചെയ്ത് ‘ഉണ്ടാക്കരുത്’

(1) ”നിങ്ങള്‍ തനിയെ ഉണ്ടായതാണോ???”

എന്നെ ആരും ‘ഉണ്ടാക്കി’യതല്ല. എന്നിലുള്ളതെന്തോ അത് ഞാനായി. ഞാനറിയാതെ, ആരുടെയും സമ്മതിമില്ലാതെ ഭ്രൂണത്തില്‍ നിന്നും സ്വയം പരിണമിച്ചു.

”ഭൂണം ഉണ്ടാകാന്‍ ആരും സമ്മതിച്ചില്ലേ എന്തു സംഭവിക്കും? ചേച്ചി സമ്മതിച്ചാലല്ലേ, അണ്ഡത്തില്‍ ബീജം കയറൂ….??? ”

ഭ്രൂണം ഉണ്ടാകാന്‍ സമ്മതം(permission) വിഷയമല്ല. സമ്മതമില്ലെങ്കിലും ഭ്രൂണം തനിയെ ഉണ്ടാകും. എല്ലാ ജീവികുലങ്ങളിലും ഉണ്ടാകും. അറിഞ്ഞുകൊണ്ട് ഉണ്ടാക്കുന്നതല്ല. അറിഞ്ഞാലും സംഭവിക്കും. ഭ്രൂണം ഉണ്ടാകാനുള്ള സമ്മതം അപ്രസക്തമാണ്. പലരും സമ്മതിച്ചിട്ടും ആഗ്രഹിച്ചിട്ടും അതു നടക്കാറില്ല. അവരുടെ വേദന നാം കാണുന്നതാണ്. എല്ലാം തനിയെ സംഭവിക്കണം, അല്ലെങ്കില്‍ തനിയെ സംഭവിക്കാനുള്ള സാഹചര്യമൊരുങ്ങണം. എന്തായാലും തനിയെ തന്നെ വേണം.

(2) തനിയെ ഉണ്ടാകാത്ത (evolve on its own) വസ്തുക്കളൊന്നും മനുഷ്യന്‍ വിചാരിച്ചാലും ഉണ്ടാകില്ല. കൃത്രിമമായ വസ്തുക്കള്‍ തനിയേ സാധ്യമായവ മാത്രമാണ്. ചിലവ ഉണ്ടാകാനുള്ള സാധ്യത നിലവിലുള്ള സാഹചര്യങ്ങളില്‍ കുറയാം എന്നു മാത്രം. മനുഷ്യന്‍ വരുന്നതിന് മുമ്പ്, അതായത്, ഏതാണ്ട് ഒരു ലക്ഷം വര്‍ഷം മുമ്പ് ആരാണ് ഇവിടെ വസ്തുക്കള്‍ ‘ഉണ്ടാക്കി’യത്? മനുഷ്യന്‍ ഇല്ലാത്തിടത്ത് കാണുന്ന വസ്തുക്കളൊക്കെ ആരാണ് ഉണ്ടാക്കിയത്? ഉണ്ടാകേണ്ടത് മാത്രമേ ഉണ്ടാകൂ.

(3) ഉണ്ടാകുക എന്നാല്‍ പരിണാമം എന്നര്‍ത്ഥം. ഉണ്ടാകുന്നത് പദാര്‍ത്ഥഗുണവും രാസഗുണവും ആധാരമാക്കിയാണ്. മണലും സിമന്റും കല്ലും കുഴച്ചുവെച്ചാല്‍ കോണ്‍ക്രീറ്റാവില്ല. കോണ്‍ക്രീറ്റ് തനിയെ ഉണ്ടാക്കാനുള്ള ശേഷി അതിന്റെ ഘടക പദാര്‍ത്ഥങ്ങള്‍ക്കുണ്ടാകണം. ജലം, മണല്‍, സിമന്റ്, കമ്പി… ഇവയില്‍ ഏതെങ്കിലും ഒരെണ്ണം ഇല്ലെങ്കില്‍ കോണ്‍ക്രീറ്റ് ഇല്ല. കോണ്‍ക്രീറ്റ് ഉണ്ടാകുന്നത് സൗകര്യപ്പെടുത്താന്‍ മേശിരിക്കു സാധിക്കും. എന്നാല്‍ മേശിരി ഇല്ലാതെയും അതു സംഭവിക്കും. സാധ്യത താരതമ്യേന കുറവായിരിക്കുമെന്ന് മാത്രം.

(4) തനിയെ അല്ലാതെ എന്നത് തനിയെ എന്നതിന്റെ വിപരീതമായി പൊതുവെ ഉപയോഗിക്കുന്നതാണ്. ഡിങ്കന്‍അഡിങ്കന്‍ എന്നൊക്കെ പറയുന്നതുപോലെ. പദം ഉള്ളതുകൊണ്ട് കാര്യം സാധുവാണെന്നോ സംഭവ്യമാണെന്നോ അര്‍ത്ഥമില്ല. തനിയെ അല്ലാതെ ഒന്നും ഉണ്ടാകുന്നില്ല. അതായത് തനിയെ മാത്രം ഉണ്ടാകുന്നു. തനിയെ അല്ലാതെ എന്തോ ഉണ്ടാകുന്നു എന്ന മനോവിഭ്രാന്തിയാണ് മതചിന്ത.

(5) ‘ഇല്ലായ്മയില്‍ നിന്ന്’ ദ്രവ്യം ഉണ്ടാകില്ല. ഇല്ലായ്മ എന്നാല്‍ ഒന്നും ഇല്ലാത്ത അവസ്ഥ എന്നല്ലേ അര്‍ത്ഥം? അതില്‍ നിന്ന് ‘എന്തെങ്കിലും’ ഉണ്ടാകുന്നത് എങ്ങനെയാണ്? ദ്രവ്യത്തെ ഉണ്ടാക്കേണ്ട കാര്യമില്ല, അതുള്ളതാണ്, നശിപ്പിക്കാനുമാവില്ല. ദൈവം/കാക്രിപൂക്രി/ഡിങ്കോലാഫി ഇവയൊന്നും ഉള്ള കാര്യങ്ങളല്ല. അതുകൊണ്ട് തന്നെ അത്തരം ചിന്ത വെറും ഭാവനാവ്യായാമമാണ്. എന്നാല്‍ ദ്രവ്യം ഉണ്ട്, തെളിവുണ്ട്, ജ്ഞേയമാണ്, യുക്തിസഹമാണ്, അനുഭവവേദ്യമാണ്, ഞാനതാണ്, നിങ്ങളതാണ്.

(6) ബിഗ് ബാംഗ് സിദ്ധാന്തപ്രകാരം പ്രപഞ്ചം നിലവില്‍ വന്നിട്ടു 1382 കോടി വര്‍ഷമായി. ഭൂമിയും സൂര്യനും വന്നിട്ട് 460 കോടി വര്‍ഷങ്ങളും. എന്നാല്‍, കഷ്ടിച്ച് ഒരു ലക്ഷം വര്‍ഷം മുമ്പ് ഉരുത്തിരിഞ്ഞ മനുഷ്യന്‍ എന്ന ജീവിവര്‍ഗ്ഗം നിര്‍മ്മിച്ച സോപ്പ്, ചീപ്പ്, വാച്ച്, ഫാന്‍, ഉണ്ടന്‍പൊരി എന്നിവയൊക്കെ ചൂണ്ടിക്കാട്ടി ഇതുപോലെ ആരാണ്ട് കുത്തിയിരുന്നു ഉണ്ടാക്കയതല്ലേ ഈ പ്രപഞ്ചം മുഴുവന്‍ എന്നു ചിന്തിക്കാന്‍ എളുപ്പമാണ്, പക്ഷെ ചപലമാണ്. പ്രപഞ്ചത്തിലെ 99.999% വസ്തുക്കളും മനുഷ്യന്‍ നിര്‍മ്മിച്ചവയല്ല.

(7) നെബുലകളും ഗാലക്‌സികളും തമോഗര്‍ത്തങ്ങളും മലയും പുഴയും മഴയും മിന്നലും കടലും കടലാടിയും ഉണ്ടായത് അവനറിഞ്ഞല്ല. മനുഷ്യന്‍ ദോശ ചുടുന്നത് പോലെ ആരോ കുത്തിയിരുന്നു ചുട്ട ദോശയാണ് പ്രപ്ചമെന്ന പരിഹാസ്യമായ അന്ധവിശ്വാസമാണ് മതത്തിന്റെ കാതല്‍. എന്നിട്ട് ഉണ്ടാക്കിയ ഇല്ലാത്ത മാമന്‍ സ്വയം ഉണ്ടായതായും പ്രഖ്യാപിക്കുന്നു. എന്നാല്‍ ഉള്ളതിനെ(ദ്രവ്യം) പരിഗണിക്കുന്നില്ല, ശ്യാമോര്‍ജ്ജമായും(black energy) പ്രതിദ്രവ്യമായും (anti-matter) അതു നിലകൊള്ളുന്നത് അംഗീകരിക്കുന്നുമില്ല.

(8) ഭൗതികവാദികള്‍ ദ്രവ്യം അനാദിയാണെന്നു പറയുന്നു അവര്‍ ദൈവം/പ്രേതം അനാദിയാണെന്ന് പറയുന്നു. ഇതു തമ്മിലെന്താ വ്യത്യാസം? വ്യത്യാസമേയുള്ളൂ. ഉളള്ളതും, തെളിവുള്ളതും, ജ്ഞേയവും, അനുഭവവേദ്യവും, യുക്തസഹമായതുമായ ഒന്ന് എന്നുമുണ്ടായിരുന്നു എന്നു പറയുന്നതില്‍ തെറ്റില്ല. അതിനെ നിര്‍മ്മിക്കാനോ നശിപ്പിക്കാനോ കഴിയില്ലെന്നതിനാല്‍ വിശേഷിച്ചും. നിര്‍മ്മിക്കാനാവാത്ത ഒന്ന് നിലവിലുണ്ടെങ്കില്‍ അത് എന്നുമുണ്ടായിരുന്നു എന്നു കരുതേണ്ടിവരും.

(9) ഉള്ള ഒന്നിനെ നശിപ്പിക്കാനാവില്ലെങ്കില്‍ അത് എന്നുമുണ്ടായിരിക്കും എന്നും അംഗീകരിക്കേണ്ടതുണ്ട്. അതേസമയം, ദൈവം/പ്രേതം എന്നിവ ഇല്ലാത്തതും തെളിവില്ലാത്തതും അജ്ഞേയവുമാണ്. കയ്യിലിരിക്കുന്ന ചെമ്പനീരിനു നറുമണമുണ്ടെന്നു പറയുന്നതും ആകാശകുസുമം കറുത്തു തുടത്തതാണെന്നു പറയുന്നതും തമ്മിലുള്ള വ്യത്യാസമവിടെയുണ്ട്. ദ്രവ്യത്തിന്റെ രൂപഭാവഭേദങ്ങളാണ് പ്രപഞ്ചത്തിന്റെ അവസ്ഥാന്തരങ്ങള്‍ നിര്‍മ്മിക്കുന്നത്. സ്വഭാവികമായ നിര്‍ധാരണമാണതിന്റെ അടിസ്ഥാനം. പ്രപഞ്ചം മാറിമറിയും, ദ്രവ്യം നിലനില്‍ക്കും. കാരണം എന്നും അതുള്ളതാണ്… ഉള്ള ഒന്നിനെ ദയവ് ചെയ്ത് ‘ഉണ്ടാക്കരുത്’!

Messiyon

(1) പ്രപഞ്ചം നിഗൂഡവും അതിസങ്കീര്‍ണ്ണമാണ്. അതിനെ ശാസ്ത്രംകൊണ്ടും യുക്തികൊണ്ടും അറിയാനാവും എന്നു കരുതുന്നത് മണ്ടത്തരമാണ്…..അതുകൊണ്ട്? അതുകൊണ്ട്, മതചപ്ലാച്ചികള്‍ അംഗീകരിക്കുക!

മനുഷ്യമസ്തിഷ്‌ക്കം സങ്കീര്‍ണ്ണവും നിഗൂഡവുമാണ്. അതിനെ ശാസ്ത്രംകൊണ്ടോ യുക്തികൊണ്ടോ അറിയാനാവും എന്നു കരുതുന്നത് മണ്ടത്തരമാണ്…. അതുകൊണ്ട്? അതുകൊണ്ട് മതനേതാക്കളുടെ മനോവിഹ്വലതകള്‍ സത്യവും സാധുവുമായി കണ്ട് ഉരുളുക, പട്ടിണി കിടക്കുക, ശരീരഭാഗങ്ങള്‍ മുറിക്കുക!

(2) വിശ്വാസിയുടെ ഇഷ്ടപദാര്‍ത്ഥം അന്ധതയും അജ്ഞതയുമാണ്. Darkness and ignorance are his favourite brands of ice creams! എന്തെങ്കിലും അറിയാന്‍ പ്രയാസമാണെന്ന് കണ്ടാല്‍ അവന്റെ നാവില്‍ വെള്ളമൂറും. Simply, god of gaps! സ്വന്തം വിവരക്കേടും മതഉടായിപ്പുകളും കുത്തിനിറയ്ക്കാന്‍ പറ്റിയ ഇടങ്ങളാണവ. മോഷ്ടിക്കാന്‍ വരുന്നവന്‍ ആദ്യം പ്രകാശം കുത്തിയണക്കും. ആര്‍ക്കും ഒന്നും കാണാനാവില്ലെന്ന് വരുമ്പോള്‍ മോഷണം എളുപ്പമാണ്. നോക്കൂ, ആര്‍ക്കും ഒന്നുമറിയില്ല, ഒന്നും കണ്ടുപിടിക്കാനാവില്ല…., എല്ലാം നമ്മുടെ ശേഷിക്ക് അപ്പുറത്താണ്……ആകെ ‘പൊക’യാണ് …..കണ്‍ഫ്യൂഷനാണ്…..അതുകൊണ്ട് മാതമാലിന്യങ്ങളെ വിശുദ്ധമായി കണ്ട് ആദരിക്കുക. അതാകുമ്പോള്‍ നിഗൂഡമാകുന്നതും സങ്കീര്‍ണ്ണമാകുന്നതും അജ്ഞേയമാകുന്നതും ഒന്നും ഒരു പ്രശ്‌നമേയല്ല. അവയൊക്കെ അവിടെ ഒരു സൗകര്യമാണ്. തമസ്സ് നേര്‍പ്പിക്കപ്പെടരുത്. എങ്കിലേ മോഷണവും ചൂഷണവും സുസാധ്യമാകൂ. മതത്തിന് ഈ നിഗൂഡതയ്ക്കും സങ്കീര്‍ണ്ണതയ്ക്കും വിശദീകരണമുണ്ടോ? ”ഏയ്, അങ്ങനെയൊന്നുമില്ല, മതം ശാസ്ത്രമല്ലല്ലോ!” നിങ്ങള്‍ക്കൊന്നുമറിയില്ല, ഞങ്ങള്‍ക്ക് എല്ലാമറിയാം എന്നതിന് വേറെ തെളിവു വേണോ?!

(3) മതംപറയുന്ന ദൈവം അസംബന്ധമാണെന്ന് ഞാനും സമ്മതിക്കുന്നു. പക്ഷെ എന്തൊക്കെ പറഞ്ഞാലും ഒരു ഊര്‍ജ്ജം അല്ലെങ്കില്‍ ഒരു ശക്തി ഇല്ലെന്ന് പറയാനാവുമോ? ഒരു ഉത്താരാധുനിക അന്ധവിശ്വാസി സ്ഥിരം വന്നു ചോദിക്കുന്നു. അങ്ങനെ ഒരു ശക്തിയെ കിട്ടിയാല്‍ അടങ്ങുന്നതാണോ മതകലിപ്പ്? എന്നാല്‍ ഒരെണ്ണംതാരം. പ്രപഞ്ചത്തിനു കാരണമായ, എല്ലാ നിഗൂഡതയും രമ്യതപ്പെടുന്ന ഒരു(?) ഊര്‍ജ്ജം ഉണ്ടെന്നിരിക്കട്ടെ. ഒന്നില്‍ കൂടാന്‍ പാടില്ലെന്നാണല്ലോ മതനിര്‍ബന്ധം. അതുകൊണ്ട് ഒരു ഊര്‍ജ്ജം എന്ന വാദം അംഗീകരിക്കുക-ഒരാശ്വസത്തിന്. ഇനി, ചോദ്യമിതാണ്, അങ്ങനെ ഒന്ന് ഉണ്ടെങ്കില്‍ മനുഷ്യന്‍ എന്ന സ്പീഷിസിന് എന്ത്?

(4) ഉദാഹരണമായി, പ്രകാശത്തെയും ടാക്കിയോണിനെയും അതിലംഘിക്കുന്ന ‘മെസ്സിയോണ്‍'(Messiyon) എന്ന ഊര്‍ജ്ജരൂപമാണ് പ്രപഞ്ചത്തിന്റെ മൂലകാരണം എന്നിരിക്കട്ടെ. അതാണ് ഗാലക്‌സികളെയും ബ്ലാക്ക് ഹോളുകളെയും വേംഹോളുകളെയുമൊക്കെ നിര്‍മ്മിക്കുന്നത്. എല്ലാം അവസാനം മെസ്സിയോണ്‍ ആയിത്തീരും…എല്ലാം വരുന്നത് അതില്‍ നിന്നാണ്…എല്ലാം അങ്ങോട്ടുപോകുന്നു…അത് അചരവും അമരവുമാണ്….. ഗാലക്‌സികള്‍ മെസ്സിയോണിന്റെ അവാന്തര അവസ്ഥ മാത്രം.. ഒക്കെ നീങ്ങിപ്പോകും.. ആത്യന്തികമായി മെസ്സിയോണ്‍ മാത്രം ശേഷിക്കും….ഒക്കെ സമ്മതിച്ചു. അപ്പോഴും ആവര്‍ത്തിക്കുന്നത് അതേ ചോദ്യങ്ങള്‍: അതുകൊണ്ട് മനുഷ്യനെന്ത്? ഭൂമിക്കെന്ത്? സൂര്യനെന്ത്? മതത്തിനെന്ത്? നാസ്തികതയ്‌ക്കെന്ത്? മതത്തിനു മാത്രം ആ ഊര്‍ജ്ജം റേഷനരിയും മണ്ണെണ്ണയും കൊടുക്കുമെന്ന് പറയുന്നതിന്റെ സാംഗത്യം എന്താണ്? പായസം തിളപ്പിച്ചും പട്ടിണി കിടന്നും ശ്വാസംപിടിച്ചും ആ ‘ഊര്‍ജ്ജ’ത്തെ ചൊറിയുന്നത് എങ്ങനെയാണ്????

മതമാമന്മാര്‍

1) മതം എന്നു കേള്‍ക്കുമ്പോഴേ ഹൃദയം തരളിതമാകുകയും കണ്ണു നിറയുകയും ചെയ്യുന്ന ചിലരുണ്ട്. മതത്തെ സംരക്ഷിക്കാന്‍ ജീവന്‍ വരെ കൊടുക്കുമെന്നാണ് ഇവരുടെ അവകാശവാദം. വാസ്തവത്തില്‍ ഇതൊരു പരസ്യ നിലപാടു മാത്രമാണ്. സ്വകാര്യതലത്തില്‍ ഇവര്‍ മതത്തിനെതിരെ തീ തുപ്പുന്നതു കണ്ടാല്‍ കണ്ടുനില്‍ക്കാനാവില്ല. പക്ഷെ മൈക്കുംവേദിയും കിട്ടിയാല്‍ പിന്നെ ശമനമില്ലാത്ത ഒലിപ്പീരാണ്. 2015 നവം 8 നു തൃശൂരില്‍ വെച്ച് വാസ്തുലഹരി: ചൂഷണത്തിന്റെ കന്നിമൂലകള്‍ എന്ന എന്റെ പുസ്തകം പ്രകാശനം ചെയ്യാന്‍ ഒരു മാന്യവ്യക്തിയെ ഡി.സി ബുക്‌സ് ക്ഷണിച്ചിരുന്നു. അദ്ദേഹം ആദ്യം വാസ്തുശാസ്ത്രം കപടമാണ്, തട്ടിപ്പാണ് എന്നൊക്കെ സ്ഥാപിച്ചു സംസാരിച്ചു. എന്നാല്‍ പുസ്തകത്തിന്റെ ആമുഖം വേദിയില്‍ വെച്ച് ഒന്നോടിച്ചു വായിച്ചപ്പോള്‍ കണ്ട ഒരു ഭാഗം ടിയാനെ പ്രകോപിതനായി. അതു ഇങ്ങനെയായിരുന്നു:

Continue Reading

ദര്‍പ്പണത്തിലെ മാലിന്യം

ദര്‍പ്പണത്തിലെ മാലിന്യം

(1) ഇന്നു രാവിലെ മുതല്‍ രാഹുല്‍ പശുപാലനെ( Kiss of Love activist) കുറിച്ചുള്ള വാര്‍ത്തയോട് പ്രതികരണം ആരാഞ്ഞ് മെസേജുകളും ഫോണ്‍വിളികളുമുണ്ടായതു വിചിത്രമായി തോന്നി. Don’t know why people ask me to EXPLAIN! രാഹുല്‍ നിയമവിരുദ്ധമായി എന്തെങ്കിലും ചെയ്‌തെങ്കില്‍ അതു നിയമപ്രകാരം കൈകാര്യം ചെയ്യേണ്ട വിഷയമാണ്. അതിനെ ചുംബനസമരം എന്ന പ്രതീകാത്മക സമരവുമായി ബന്ധിപ്പിച്ച് ചര്‍ച്ച ചെയ്യുന്നതില്‍ കഥയില്ല. അതൊരുതരം തരംതാണ ചൊരുക്കുതീര്‍ക്കലാണ്. ചുംബനസമരത്തില്‍ പങ്കെടുത്തവര്‍ ജീവിതത്തിന്റെ ഭിന്നമേഖലകളില്‍ ഉണ്ടാക്കുന്ന നേട്ടങ്ങള്‍ ചുംബനസമരത്തെ സാധൂകരിക്കുമോ? ഇല്ല എന്നാണ് ഉത്തരമെങ്കില്‍ കോട്ടങ്ങളും അത്തരത്തില്‍ തന്നെ വിലയിരുത്തപ്പെടേണ്ടതുണ്ട്.

(2) സ്വാതന്ത്ര്യസമരത്തിലും മാറുമറയ്ക്കല്‍ സമരത്തിലും ഭൂപരിഷ്‌ക്കരണ സമരത്തിലും പങ്കെടുത്ത പലരുടെയും പിന്നീടുള്ള വ്യക്തിഗതജീവിതം പരിശോധിച്ചാല്‍ അതില്‍ നല്ലതും ചീത്തയുമായ കാര്യങ്ങള്‍ കണ്ടെത്താനാവും. പലരും പില്‍ക്കാലത്ത് കുറ്റകൃത്യങ്ങള്‍ ചെയ്തിട്ടുണ്ടാവാം, കേസുകളില്‍ പ്രതികളായിട്ടുണ്ടാവും, ആത്മഹത്യ ചെയ്തിട്ടുണ്ടാവാം….നേട്ടങ്ങളുണ്ടാക്കിയിട്ടുണ്ടാവാം, സമ്പന്നരായിട്ടുണ്ടാവാം, പ്രസിദ്ധി നേടിയിട്ടുണ്ടാവാം….നല്ലതും മോശവുമായ വാര്‍ത്തകള്‍ അവിടെ കാണാനാവും. പക്ഷെ അവയൊന്നു പ്രസ്തുത ഈ സമരങ്ങളുടെ അന്തസത്തയെ ബാധിക്കുന്നില്ല. ഒരു സമരത്തില്‍ പങ്കെടുത്ത ഒരാള്‍ക്കു പില്‍ക്കാലത്തു ഭ്രാന്തു പിടിച്ചാല്‍ സമരത്തെ ഭ്രാന്തരുടെ സമരം എന്നു വിളിക്കുമ്പോള്‍ നിങ്ങള്‍ ആകെ വിളിച്ചു പറയുന്നത് ആ സമരം നിങ്ങളെ എത്രമാത്രം അലോരസപ്പെടുത്തി എന്നു മാത്രമാണ്.

(3) ചുംബനസമരക്കാരുമായി അഭിമുഖം നടത്തിയത് എന്തിനായിരുന്നു എന്നതാണ് മറ്റൊരു ചോദ്യം. smile emoticon ആശയപരമായി യോജിക്കുന്നവരുമായും അല്ലാത്തവരുമായും അഭിമുഖം നടത്തിയിട്ടുണ്ട്. I met the Kiss of Love team once. രാഹുല്‍ സിനിമാ പ്രവര്‍ത്തകനാണ്;രശ്മി മോഡലും. ഇരുവരും സ്വതന്ത്രചിന്തകരോ നാസ്തികരോ ആണെന്നു ഞാന്‍ കരുതുന്നില്ല-അല്ലെങ്കില്‍ എനിക്കറിയില്ല. രാഹുല്‍ പിടിയിലാകുമ്പോള്‍ കേരളത്തിലെ മോഡലുകളും സിനിമാപ്രവര്‍ത്തകരും മോശക്കാരാണെന്ന വിധി വരുമോ? കേരളത്തില്‍ പെണ്‍വാണിഭരംഗത്തു പ്രവര്‍ത്തിക്കുന്ന ഇടപാടുകാര്‍, വിതരണക്കാര്‍, ഉപഭോക്താക്കള്‍ എന്നിവരുടെ കണക്കെടുത്താല്‍ അവരില്‍ മഹാഭൂരിപക്ഷവും ചുംബനസമരവിരുദ്ധ-മതപക്ഷക്കാരായിരിക്കും! അങ്ങനെയാവാന്‍ ഒരു കാരണം അക്കൂട്ടരാണ് കേരളത്തില്‍ കൂടുതല്‍ എന്നതാണ്. സ്ത്രീപീഡനവും അക്രമവും അഴിമതിയും നടത്തുന്നവരുടെ പട്ടിക എടുത്താലും അക്കൂട്ടര്‍ക്കു മൃഗീയ ഭൂരിപക്ഷമുണ്ടാവും. കുട്ടികള്‍ക്കെതിരെയുള്ള ലൈംഗികപീഡനവും വിവാഹതട്ടിപ്പുമൊക്കെ ഇതേ വിഭാഗങ്ങളുടെ കുത്തകയാണ്. ജയിലിനകത്തും പുറത്തുമുള്ള കുറ്റവാളികളുടെ എണ്ണത്തിലും സ്ഥിതി ഭിന്നമല്ല.

(4) ആശയങ്ങളെ വ്യക്തിതലത്തിലേക്ക് ചുരുക്കുന്നത് മതാത്മകമായ നിലപാടാണ്. ചുംബനസമരം ഏതെങ്കിലും ഒരു വ്യക്തിയെ കേന്ദ്രീകരിച്ചുണ്ടായതല്ല. അന്യന്റെ സ്വകാര്യതയിലേക്ക് കടന്നു കയറുന്ന സദാചാരപോലീസ് എന്ന സാമൂഹിക വിപത്തിനെതിരെ എതിരെ നടന്ന പ്രതീകാത്മകമായ പൗരസമരമാണത്. ഇന്നും എന്നും പ്രസക്തമായ കാര്യം! സമരം നടത്തിയ നൂറു കണക്കിനു വ്യക്തികള്‍ വേറെയുമുണ്ട്. ഭാവിയില്‍ വ്യക്തിജീവിതത്തില്‍ അവര്‍ സ്വീകരിക്കുന്ന നിലപാടുകള്‍ ചുംബനസമരത്തിന്റെ ബാധ്യതയല്ല. ചുംബനസമരം ആസൂത്രിതമായിരുന്നില്ല. കെട്ടുറപ്പുള്ള ഒരു സംഘടനയോ നീണ്ടകാലത്തെ തയ്യാറെടുപ്പോ അതിന്റെ പിന്നിലുണ്ടായിരുന്നില്ല. എങ്കിലും അതു ലോകശ്രദ്ധ ആകര്‍ഷിച്ചു, ജനം സന്ദേശം ശ്രദ്ധിച്ചു. സമരത്തിനു ശേഷം ‘സദാചാര പോലീസിംഗ്’ വര്‍ദ്ധിച്ചു എന്നു പറയുന്നതില്‍ കഥയില്ല. സമരം ഇല്ലായിരുന്നുവെങ്കില്‍ എന്താകുമായിരുന്നു സ്ഥിതി എന്നതിനെ കുറിച്ച് മുന്‍കൂര്‍ വെളിപാടുള്ളവര്‍ക്ക് മാത്രം പറയേണ്ട ചപല ന്യായമാണത്. ചുംബനസമരം മൂലമാണ് ഇന്നു ഇത്രയെങ്കിലും ഭേദപ്പെട്ട സ്ഥിതി കേരളത്തില്‍ ഉള്ളതെന്ന മറുവാദത്തിനു അക്കൂട്ടര്‍ ഉത്തരം നല്‍കേണ്ടതുമുണ്ട്.

(5) പൊതുജന പ്രതിഷേധത്തിന്റെ സ്വാഭാവികപരിണതി ആയ ഒരു സമരത്തില്‍ ആസൂത്രണവും അവലോകനവും ഇല്ലാതിരുന്നത് പോരായ്മയായി തോന്നാം. പക്ഷെ ഇവയൊക്കെയുള്ള സമരങ്ങള്‍ ദയനീയമായി പരാജയപ്പെടുന്ന ചരിത്രവും നമ്മുടെ മുന്നിലുണ്ട്. പെട്ടെന്നുള്ള പ്രതിഷേധവും ആസൂത്രിതമായ പ്രതിഷേധവും വ്യത്യസ്ത രീതിശാസ്ത്രങ്ങള്‍ അവലംബിക്കുന്നുവെങ്കിലും ഫലത്തിന്റെ കാര്യത്തില്‍ ഉറപ്പൊന്നുമില്ല. മാറുമറയ്ക്കല്‍ സമരവും തല്ലി തകര്‍ക്കപ്പെട്ട സമരമാണ്. പക്ഷെ അതിനിന്നും ചരിത്രത്തില്‍ സ്ഥാനമുണ്ട്. പൗരാവകാശസമരങ്ങളും സംഘടനാസമരങ്ങളും തമ്മില്‍ വ്യത്യാസമുണ്ട്. പൗരാവകാശ സമരങ്ങളില്‍ എവിടെ നിന്നു ആരെല്ലാം പങ്കെടുത്തുവെന്ന് തിട്ടപ്പെടുത്താനാവില്ല. നല്ലവരും മോശക്കാരും കുറ്റവാളികളും വിശുദ്ധരും കമ്മ്യൂണിസ്റ്റുകാരും കോണ്‍ഗ്രസ്സുകാരും തൊഴിലാളിയും മുതലാളിയും അവര്‍ക്കിടയിലുണ്ടാവും. ചിലര്‍ ഘോഷയാത്രയുടെ മുന്നില്‍ സ്ഥാനംപിടിക്കും. അത്തരക്കാര്‍ക്ക് കൂടുതല്‍ ജനശ്രദ്ധ ലഭിച്ചെന്നുവരാം. ചുംബനസമരത്തെ അനുകൂലിച്ചവരില്‍ 99% അതില്‍ പങ്കെടുത്തിട്ടില്ല. അതിനോടു അനുഭാവമുള്ളവരില്‍ മഹാഭൂരിപക്ഷവും രംഗത്തു വന്നിട്ടുമില്ല.

(6) കേഡര്‍പാര്‍ട്ടികള്‍ നടത്തുന്ന ആസൂത്രിത സമരങ്ങളില്‍വരെ ക്രിമിനലുകളും പെണ്‍വാണിഭക്കാരുമൊക്കെ പങ്കെടുത്തെന്നുവരാം. ചുംബനസമരത്തില്‍ മവോയിസ്റ്റുകള്‍ പങ്കെടുത്തതായി റിപ്പോര്‍ട്ടു വന്നിരുന്നു. അത്തരക്കാര്‍ വരരുതെന്നോ പങ്കെടുക്കരുതെന്നോ പറയാനുള്ള സംഘടനാ ചട്ടക്കൂട് ആ സമരത്തിനു ഉണ്ടായിരുന്നില്ല. ഒരര്‍ത്ഥത്തില്‍ അതു എല്ലാവരുടെയും സമരമായിരുന്നു. സമരത്തെ താറടിക്കാന്‍ ശ്രമിച്ചവര്‍ ആദ്യം മാവോയിസ്റ്റുകളുടെ സാന്നിധ്യം ചൂണ്ടിക്കാട്ടി. ഇപ്പോള്‍ പെണ്‍വാണിഭ ആരോപണം. പൗരാവകാശസമരങ്ങളുടെ അടിസ്ഥാന സ്വഭാവം മനസ്സിലാക്കാത്തതുകൊണ്ടല്ല മറിച്ചു ആ സമരം തങ്ങളെ വല്ലാതെ പൊള്ളിച്ചുവെന്ന കുറ്റസമ്മതമാണ് ഇത്തരം ആരോപണം ഉന്നയിക്കുന്നവര്‍ നടത്തുന്നത്.

(7) ചുംബനസമരത്തെ എതിര്‍ത്തു നിലപാട് സ്വീകരിച്ചവരില്‍ എത്ര പെണ്‍വാണിഭക്കാരും ക്രിമിനലുകളുമുണ്ടാകും? ഇപ്പോഴത്തെ അവസ്ഥ പരിശോധിച്ചാല്‍ മതിയാകും. പരമ്പരാഗതമായി ലൈംഗികവിഷയങ്ങളും ഇക്കിളി റിപ്പോര്‍ട്ടുകളും തള്ളിവിട്ട് ഉപജീവനം നടത്തുന്ന പത്രക്കാരുടെ സ്വകാര്യവിശേഷങ്ങള്‍ ചൂണ്ടിക്കാട്ടി മാധ്യമലോകം മാപ്പിരക്കണമെന്നു ആവശ്യപ്പെടാനാവുമോ? ലൈംഗികപീഡനവും പെണ്‍വാണിഭവും ക്രിമിനല്‍ കുറ്റങ്ങളുമാണ് മാനദണ്ഡമെങ്കില്‍ എങ്ങനെയാണ് കേരളത്തില്‍ മതവിദ്യാലയങ്ങളും ആത്മീയ ശുശ്രൂഷാകേന്ദ്രങ്ങളും ആള്‍ദൈവങ്ങളും പ്രവര്‍ത്തിക്കുക?

(8) ചുംബനസമരം കഴിഞ്ഞു ഒരു വര്‍ഷം കഴിഞ്ഞു നടത്തിയ കുറ്റകൃത്യത്തിനാണ് ഇപ്പോള്‍ രാഹുല്‍ പിടിയിലായിരിക്കുന്നത്(If the report is true). പിടിയിലായവരുടെ കൂട്ടത്തില്‍ മത-സദാചാരവാദികളുണ്ട്. ഇനി വെളിച്ചത്തു വരാന്‍പോകുന്ന മഹാഭൂരിപക്ഷ പെണ്‍വാണിഭ കേസുകളിലും സദാചാരമതവാദികള്‍ക്കു തന്നെയാവും ഭൂരിപക്ഷം. അപ്പോള്‍ നാമതങ്ങനെ വിലയിരുത്തും? കേരളത്തില്‍ ഇടക്കാലത്തുണ്ടായ തീവ്രമതപരതയും ഒളിഞ്ഞുനോട്ട മനസ്സും ചോദ്യം ചെയ്യപ്പെട്ടത് ഒരു വിഭാഗത്തെ ചൊടിപ്പിച്ചിട്ടുണ്ട്. അവരാണ് ഈ വാര്‍ത്ത വന്യമായി ആഘോഷിക്കുന്നത്.

(9) രാഹുലും മറ്റും ഇതു ചെയ്യുമെന്ന് പണ്ടേ ഞങ്ങള്‍ പറഞ്ഞുവെന്ന് ഒരു വിഭാഗം അവകാശപ്പെടുന്നത്. പക്ഷെ അങ്ങനെയായിരുന്നില്ലോ അവരന്ന് പറഞ്ഞത്. അവര്‍ എതിര്‍ത്തത് ചുംബനസമരത്തെയാണ്. ചുംബനസമരവിരുദ്ധ-തമോശക്തികള്‍ എല്ലാത്തരം ഹീനകൃത്യങ്ങളും ചെയ്യുമെന്ന് തന്നെയാണ് എതിര്‍പക്ഷം പറയുക. മിക്കപ്പോഴും അങ്ങനെ തന്നെ സംഭവിക്കാറുമുണ്ട്. ഉദാഹരണം-കന്യാസ്ത്രീകള്‍ നേരിടേണ്ടിവരുന്ന പീഡനം, മദ്രസ്സകളിലെയും ആള്‍ദൈവാശ്രമങ്ങളിലെയും ലൈംഗികപീഡനം, കള്ളക്കടത്ത്, നികുതിവെട്ടിപ്പുകള്‍, കൊലകള്‍, മയക്കുമരുന്ന് ഉപയോഗം…. ഇതെല്ലാം വ്യാപകമായി ചൂണ്ടിക്കാട്ടപ്പെടാറുണ്ട്. പലപ്പോഴും അങ്ങനെതന്നെ സംഭവിക്കുകയും ചെയ്യുന്നു. പക്ഷെ ഇതൊക്കെ നടന്നാലും ഇല്ലെങ്കിലും അത്തരം പ്രവര്‍ത്തനങ്ങള്‍ ആശയതലത്തില്‍ എതിര്‍ക്കപ്പെടേണ്ടതാണെന്ന നിലപാടാണ് സ്വതന്ത്രചിന്തകര്‍ സ്വീകരിക്കുക.

(10) ഈ രാജ്യത്തെ പൗരര്‍ എന്ന നിലയില്‍ പൗരാവാകാശ സമരങ്ങളില്‍ പങ്കെടുക്കാന്‍ എല്ലാവര്‍ക്കും അവകാശവും അധികാരവുമുണ്ട്. ഭാവിയില്‍ പെണ്‍വാണിഭത്തില്‍ കുടുങ്ങും എന്നു തിരിച്ചറിഞ്ഞ് ആരെയെങ്കിലും മാറ്റി നിര്‍ത്താന്‍ ആര്‍ക്കാണ് സാധിക്കുക? ചുംബനസമരത്തില്‍ പങ്കെടുത്തവരുമായി അഭിമുഖം നടത്തിയപ്പോള്‍ മനസ്സിലായത് അവരില്‍ പലരും മതവിശ്വാസികളും ഭക്തരും ആണെന്നായിരുന്നു. കേരളത്തിലെ മുഴുവന്‍ മതവിശ്വാസികളും ഇതിനു ഉത്തരം പറയേണ്ടി വരുമോ? ചുംബന സമരക്കാരില്‍ കമ്മ്യൂണിസ്റ്റുകളും കോണ്‍ഗ്രസ്സുകാരും മതവിശ്വാസികളും നാസ്തികരുമൊക്കെ ഉണ്ട്. മറുവശത്തും എല്ലാത്തരക്കാരുമുണ്ട്. അതില്‍ രാഹുലനും പത്‌നിയും അറസ്റ്റിലാകുന്നതു മാത്രം എങ്ങനെ സ്വതന്ത്രചിന്തകര്‍ക്കെതിരെ ഉയര്‍ത്തിക്കാട്ടാനാവും? കേസിനു ആസ്പദമായി ചൂണ്ടിക്കാണിക്കുന്ന സൈബര്‍ഗ്രൂപ്പിനെ റിപ്പോര്‍ട്ട് ചെയ്തു പൂട്ടിച്ചത് സ്വതന്ത്രചിന്തകരാണെന്നിരിക്കെ ഈ കേസില്‍ സത്യമുണ്ടെങ്കില്‍ അതിന്റെ ക്രെഡിറ്റ് അവര്‍ക്കു നല്‍കി അവരെ അഭിനന്ദിക്കുകയല്ലേ വേണ്ടത്?

(11) ദര്‍പ്പണം മലിനമായാല്‍ പ്രതിരൂപങ്ങള്‍ മങ്ങും. അതു ദര്‍പ്പണത്തിന്റെ കുഴപ്പമാണ്. എല്ലാത്തരം ആശയങ്ങളുടെ കാര്യവും അങ്ങനെ തന്നെ. വ്യക്തിയും ആശയവും വ്യതിരിക്തമാണ്. ആശയാധിഷ്ഠിതമായി വ്യക്തി കുറ്റം ചെയ്യുമ്പോഴേ ആശയം പ്രതിക്കൂട്ടിലാകുന്നുള്ളൂ. സ്വതന്ത്രചിന്ത പെണ്‍വാണിഭത്തെ ഒരു വിധത്തിലും പിന്തുണയ്ക്കുന്നില്ലെന്നു മാത്രമല്ല ശക്തമായി എതിര്‍ക്കുകയും ചെയ്യുന്നു. ഞാന്‍ പരസ്യമായ നാസ്തിക നിലപാട് സ്വീകരിക്കുന്ന വ്യക്തിയാണ്. പക്ഷെ മത-വിശ്വാസബാഹ്യമായ മേഖലകളില്‍ എന്റെ ജീവിതത്തില്‍ ഉണ്ടാകുന്ന വീഴ്ചകളും ക്രമക്കേടുകളും നാസ്തികതയ്‌ക്കെതിരെയുള്ള വാദമായി പരിഗണിക്കാനാവില്ല. എനിക്കു തെറ്റുപറ്റി എന്നു മാത്രമാണവിടെ തെളിയുന്നത്. അത്തരം മേഖലകളില്‍ എനിക്കുണ്ടാകുന്ന നേട്ടങ്ങളിലും നാസ്തികതയ്ക്ക് പങ്കില്ല. നാസ്തികതയും ശാസ്ത്രചിന്തയും മുന്നോട്ടു വെക്കുന്ന ലോകവീക്ഷണം അനുസരിച്ചു ജീവിക്കുന്നതു മൂലമുണ്ടാകുന്ന നേട്ടങ്ങള്‍ക്കും കോട്ടങ്ങളും മാത്രമേ അവിടെ പരിഗണിക്കാനാവൂ. സ്വതന്ത്രചിന്തയും നാസ്തികതയും ശരിയാണ്. പെണ്‍വാണിഭവും മോഷണവും ചതിയും തെറ്റാണ്. ചുംബനസമരക്കാരെ അടിച്ചോടിക്കാന്‍ എത്തിയ അധമജന്മങ്ങളും അവരുടെ പക്കമേളക്കാരും അവശ്യം തിരിച്ചറിയേണ്ട വസ്തുതയാണിത്.

ദാദ്രിയുടെ അച്ഛന്‍

(1) ബ്രാഹ്മണര്‍ പശുമാംസം ഭക്ഷിക്കുന്നത് പൂര്‍ണ്ണമായി അവസാനിപ്പിക്കുന്നത് ഗുപ്തകാലത്തോടു കൂടിയാണ്. മാംസം കഴിക്കുന്നവര്‍ അധമരായി മുദ്ര കുത്തപ്പെടുന്നതും അതിനുശേഷമാണ്. ഗോഹത്യ കടുത്ത പാപമായി ചിത്രീകരിച്ചു ധര്‍മ്മശാസനങ്ങളും പിന്നാലെയെത്തി. എന്നാല്‍ മധ്യകാലഘട്ടത്തില്‍ മുസ്ലീങ്ങളുടെ വരവോടു കൂടിയാണ് പശു ഹിന്ദുമതത്തിന്റെ വൈകാരികബിംബമായി മാറിയത്. ബ്രാഹ്മണരുടെയും ജൈനരുടെയും വികാരം മാനിച്ച് മുഗള്‍ ഭരണാധികാരികളായ ബാബര്‍, അക്ബര്‍, ജഹാംഗീര്‍ തുടങ്ങിയവരൊക്കെ പരിമിതമായ തോതില്‍ ഗോനിരോധനം ഏര്‍പ്പെടുത്തിയിട്ടുണ്ട്. മറാത്ത വീരനായ ശിവജി ബ്രാഹ്മണരുടെയും പശുക്കളുടെയും സംരക്ഷകനായാണ് അറിയപ്പെട്ടിരുന്നത്. 17, 18 നൂറ്റാണ്ടുകളിലാണ് പശുവുമായി ബന്ധപ്പെട്ടു മതസംഘര്‍ഷങ്ങളുണ്ടാകുന്നത്. പശു ഹിന്ദുക്കളുടെ മതവികാരമായി മാറുന്നതും ഇക്കാലത്താണ്.
Continue Reading

മഞ്ഞുമലയുടെ മുനമ്പ്

ഇന്ത്യയില്‍ മതമില്ലാത്തവരുടെ എണ്ണം 29 ലക്ഷമാണെന്ന് 2011 ലെ സെന്‍സസ് കണക്കുകള്‍. കേരളത്തിലിത് 88155 പേരാണത്രെ(45188 സത്രീകള്‍, 42967 പുരുഷന്‍മാര്‍). സ്ത്രീകളാണ് കേരളത്തിലെ മതരഹിതരില്‍ കൂടുതലെന്നത് അതിശയകരമായി തോന്നി. മതരഹിതരുടെ എണ്ണം തീരെ കുറവാണ് എന്നു പലരും പരിഹസിക്കുന്നതു കേട്ടു. ഈ പരിഹാസം യാഥാര്‍ത്ഥ്യവുമായി പൊരുത്തപ്പെടുന്ന ഒന്നല്ല. അവിശ്വാസികളില്‍ ഭൂരിപക്ഷവും ‘കുളിമുറി നാസ്തികരാ’ണെന്നിരിക്കെ(closet atheists) ഔദ്യോഗികമായി തന്നെ അവര്‍ മതനിഷേധം രേഖപ്പെടുത്താന്‍ സാധ്യത കുറവാണ്.ഇത്രയും പേര്‍ റിപ്പോര്‍ട്ട് ചെയ്തു എന്നതു നിസ്സാരമല്ല. മഞ്ഞുമലയുടെ മുനമ്പ് മാത്രമാണ് ഈ കണക്കുകള്‍. It is just the tip of the iceberg! Continue Reading

Copyright © 2016. Powered by WordPress & Romangie Theme.